ခြေစုံကန်ထွက်ခဲ့တာမဟုတ်ပါဘူး
ရင်ခွင်ထဲက ပြုတ်ကျခဲ့တာပါ....အမေ
အတုံးအရုံးပါပဲ
လောကဆိုတာကို စာလုံးပေါင်းကြည့်ဖို့
ကျွန်တော် မကြိုးစားမိခဲ့ဘူး
ဒါပေမဲ့...အသံထွက်တော့မှန်ခဲ့ပြီ....အမေ
ဆီးကြိုနေကြတဲ့ ကမ်းလက်တွေက
လက်ဖမိုးမပါဘူး.....အမေ
လက်ဖ၀ါးသက်သက်..
ကျွန်တော့ဆီက တောင်းယူ လုယူကြလေရဲ့
လောကဓံရဲ့ အကန်အကျောက်တွေနဲ့
ဖြူစင်မှုတွေလဲ ပြယ်လွင့်ခဲ့ပြီလေ
ကျွန်တော့ကိုခွင့်လွတ်ပါ....အမေ
ကြိုးဝိုင်းထဲမှာ မြင်သမျှလူတိုင်းက
အတ္တတွေအများကြီး ထမ်းပိုးထားကြတယ် ...အမေ
သူတို့ပင်ပန်းမှာပဲလို့ တွေးခဲ့မိပေမဲ့
ကျွန်တော်ကိုယ်တိုင်လဲ အတ္တတွေကို စနစ်တကျ ထမ်းပိုးတတ်နေပြီလေ
နေသားကျနေပါပြီ....အမေ
တစ်ရာသီဝင်တစ်ရာသီထွက်နဲ့
ကျွန်တော် ခရီးဆက်နေဆဲပါ...အမေ
ညောင်ပင်အိုမှာ နေမညိုခင်တော့
ပုခုံးပေါ်က အတ္တတွေ
နေကာမျက်မှန်တွေ
မျက်နှာဖုံးတွေထားခဲ့ပြီး
ကျွန်တော်ပြန်လာခဲ့မယ်....အမေ
အပြုံးတချို့တ၀က် မျက်ရည်တွေနဲ့ ကြိုလှည့်ပေါ့.....။
Subscribe to:
Post Comments (Atom)
0 comments:
Post a Comment