Subscribe:

အဆိပ်မိခြင်း




အလေအလွင့်များတဲ့ နေ့ရက်အရိုင်းအစိုင်းတွေပဲ ညီလေးရေ ...။

၁၉၉၇ ခုနှစ်က အိပ်ရေးပျက်တဲ့ညတွေထဲက

တယောက်တခြမ်း ခိုးလွမ်းခဲ့ဖူးတဲ့

လရောင်တွေဆိုတာ ကြာခဲ့ပါပြီ ညီလေးရေ..။



ဘ၀ကို အားတက်သရော တိုက်ခိုက်ချင်တဲ့ မင်း

စိတ်အင်နားရှားနိယာမတွေကြားမှာ

မကြာမကြာ မီးပွိုင့် မိတတ်နေပြီလား

ဘ၀ကိုဖြတ်ကူးတယ်ဆိုတာ

လမ်းဖြတ်ကူးသလို ဘယ်ညာကြည့်ရုံနဲ့

မလုံလောက်ဘူးဆိုတာကို မင်းသိနေလောက်ပါပြီကွယ်...။



ညီလေးရေ..

အချိန်ဆိုတာ တည်ငြိမ်မနေဘူးကွဲ့

ဖောက်လွဲဖောက်ပြန်သဘာဝတွေထဲမှာ

ကိုယ့်ကိုကိုယ် ပြန်လိမ်တတ်အောင် မင်းမကြိုးစားမိပါစေနဲ့

စိတ်တူကိုယ်တူ တူးဆွစိုက်ပျိုးခဲ့တဲ့ ဥယျာဉ်က

အနုပညာဆန်ခဲ့တာကလွဲရင်

လူတန်းမစေ့ခဲ့ပါဘူးကွယ်....။



မောနေပြီလား ညီလေး

တံတွေးခွက်တွေထဲမှာ ခြေကုန်လက်ပန်းကျနေပြီလား

အားမလျှော့လိုက်ပါနဲ့ကွယ်

နေ၀င်တာကို မြင်လိုက်ရရုံနဲ့

မင်းဘ၀ ညဉ့်နက်မသွားပါဘူး ညီလေးရယ်

တို့တွေ ခိုးလွမ်းခဲ့ဖူးတဲ့ လရောင်တွေကြား

မင်းအရိပ်တွေ သွက်သွက်ခါအောင် ရူးသွပ်ပြလိုက်စမ်းပါ

ကဲ့၇ဲ့သံဆိုတာ အောင်မြင်မှုဆီသွားတဲ့ လမ်းပြမြေပုံတွေပါကွယ်...။



လူငယ်တွေပဲ ညီလေးရေ

အမှားနဲ့ဘယ်ကင်းနိုင်ပါ့မလဲ

အမှန်နဲ့ကင်းနေတဲ့သူတွေကြားမှာ

ပြုံးပြုံးလေး မှားနေပါ ညီ

ပြုံးပြုံးလေးသာ မှားလို့နေပါ....။



လောကကြီးဆိုတာ

ကလေးကစားဝိုင်းလိုပဲ ညီလေး

တယောက်ဆီက တယောက်လုယူနေကြတာပဲ

ငိုပြီးပြန်သွားတဲ့သူက အမြဲတမ်း အနိုင်ကျင့်ခံရမယ် ညီလေးရေ

မင်းမျက်ရည်တွေကို မင်းမော့သောက်ပစ်လိုက်

လျှင်သူစားစတမ်း လောကဓံမှာ

တို့တွေ ၀ိနည်းလွတ်အောင် ပြုံးကြတာပေါ့ကွယ်....။



လူကြိုက်များတိုင်း ပစ္စည်းကောင်းမဟုတ်ပါဘူး ညီလေးရေ

မောင်ချောနွယ်ကဗျာထဲကလို

တို့တွေ လူကြိုက်နည်းတဲ့ ဘ၀မှာပဲ

အရေအတွက်တွေကို မေ့ထားကြတာပေါ့

ဖြစ်နိုင်မယ်ဆိုရင်

ဖြစ်လေရာဘ၀ လူကြိုက်နည်းတဲ့ကောင်သာဖြစ်ရပါလို၏ လို့

ညီညီညာညာ ဆုတောင်းကြပါစို့ကွယ်...။



ကမ္ဘာအကျယ်ကြီးထဲက

ပတ်ဝန်းကျင် ကျဉ်းကျဉ်းလေးထဲကနေ

ကမ္ဘာကြီးအကြောင်း အဆမတန်ပြောတတ်ကြတဲ့လူတွေအလယ်မှာ

လူသွားလူလာ မပြတ်စေနဲ့ ညီလေးရေ..

ဖြေဆေးကိုလိုချင်ရင် အဆိပ်အရင်သောက်မှရတယ်ဆိုတာ

ငါ့ညီ .... ရာသီတွေရင်းပြီး သိနေလောက်ပါပြီကွယ်.....။

- မင်းလုလင် -

0 comments:

Post a Comment